ലോകമെമ്പാടുമുള്ള ചർച്ചാവിഷയമാണ് ശുദ്ധവായു. കാലാവസ്ഥാ അടിയന്തരാവസ്ഥയിലൂടെയാണ് ഇന്ന് പല രാജ്യങ്ങളും കടന്നുപോകുന്നത്. ശുദ്ധമായ വായു ജീവന്റെ നിർണ്ണായക ഘടകമാണെന്ന് എല്ലാവർക്കും അറിയാം. അതിനാൽ അത് നിലനിർത്താനുള്ള വഴികൾ തിരയുകയാണ് ലോകം. വായു ശുദ്ധികരിക്കാനുള്ള ഒരു വഴിയാണ് സ്മോഗ് ടവർ (smog tower)

എല്ലാ ഭാഗങ്ങളിൽ നിന്നും വായു സ്വീകരിക്കാനും മണിക്കൂറിൽ 1,300,000 ക്യുബിക് മീറ്റർ ശുദ്ധവായു സൃഷ്ടിക്കാനും സ്മോഗ് ടവറിന് കഴിയും. മാത്രമല്ല, 40 അടി ഉയരവും 20 അടി വീതിയുമുള്ള ഒരു സ്മോഗ് ടവറിന് പ്രതിദിനം 32 ദശലക്ഷം ഘനമീറ്റർ വായു വൃത്തിയാക്കാൻ കഴിയും എന്ന് പറയുന്നു. ഒന്നിലധികം പാളികളുള്ള ഫിൽട്ടറുകളുള്ള കോൺക്രീറ്റിന്റെ ഘടനയാണിത്. ശുദ്ധമായ വായുവിന്റെ ഒഴുക്ക് തുടരാൻ ഒരു ഭീമൻ പ്യൂരിഫയറിന് 48 ഫാനുകൾ ഉണ്ടാകും. ചുറ്റുമുള്ള 3 കിലോമീറ്റർ ചുറ്റളവിൽ താമസിക്കുന്ന 75,000 ആളുകൾക്ക് ശുദ്ധവായു നൽകാൻ ഈ ഉപകരണത്തിന് കഴിയുമെന്ന് നിർമ്മാതാക്കൾ അവകാശപ്പെടുന്നു.

മലിനമായ വായുവിനെ ടവർ വലിച്ചെടുക്കുന്നു, ഇത് അന്തരീക്ഷത്തിലേക്ക് വീണ്ടും വിതരണം ചെയ്യുന്നതിന് മുമ്പ് ഒന്നിലധികം പാളികളിലൂടെ ശുദ്ധീകരിക്കപ്പെടുന്നു. വായു ശുദ്ധീകരിക്കുന്നതിനായി വളരെ ഫലപ്രദമായ എച്ച് 14 ഗ്രേഡ് ഹൈലി എഫക്റ്റീവ് പാർട്ടിക്കുലേറ്റ് അറസ്റ്റൻസ് (HEPA) ഫിൽട്ടർ ഉപയോഗിക്കുന്നു. പ്രീ-ഫിൽട്ടറിന്റെയും ആക്റ്റിവേറ്റഡ് കാർബണിന്റെയും സഹായത്തോടെ ഈ ഫിൽട്ടറിന് വായുവിൽ നിലവിലുള്ള 99.99% വസ്തുക്കളെയും വൃത്തിയാക്കാൻ കഴിയുന്നു.

ലോകത്തെ ഏറ്റവും മലിനമായ 10 നഗരങ്ങളിൽ ആറെണ്ണം ഇന്ത്യയിലാണെന്ന് ലോകാരോഗ്യ സംഘടന (ഡബ്ല്യുഎച്ച്ഒ) പറയുന്നു. ദേശീയ തലസ്ഥാനമായ ദില്ലി പട്ടികയിൽ ഒന്നാമതാണ്.