ടെസ്സി തോമസ്

ഭാരതത്തിന്റെ അഗ്നി പുത്രി എന്നും മിസൈൽ വനിതാ എന്നും അറിയപ്പെടുന്ന മലയാളിയായ ടെസ്സി തോമസ് ഭാരതത്തിന്റെ അതി ദീർഘദൂര മിസൈലായ അഗ്നി 5ന്റെ മുഖ്യശില്പിയും പദ്ധതി മേധാവിയുമാണ്. 1963 ൽ ആലപ്പുഴ ജില്ലയിൽ തത്തംപള്ളി തൈപ്പറമ്പിൽ തോമസിന്റെയും കുഞ്ഞമ്മയുടെയും മകളായി ടെസ്സി തോമസ് ജനിച്ചു. ത്രിശൂർ എഞ്ചിനീയറിംഗ് കോളേജിൽ നിന്നും ബിരുദവും പുണെ ഡിഫൻസ് ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് ടെക്നോളജിയിൽ നിന്നും ബിരുദാനന്തര ബിരുദവും കരസ്ഥമാക്കിയ ടെസ്സി തോമസ് ഹൈദരാബാദിലെ ജവഹർലാൽ നെഹ്‌റു ടെക്‌നോളജിക്കൽ യൂണിവേഴ്‌സിറ്റിയിൽ (ജെഎൻടിയു) നിന്ന് മിസൈൽ ഗൈഡൻസിൽ PhD യും നേടി. 1986 ൽ പൂനെ IATയിൽ ഗൈഡഡ് മിസൈൽസിൽ ഫാക്കൽറ്റി അംഗമായി ചേർന്ന ഡോ. ടെസ്സി തോമസ് 1988 ൽ ഡി.ആർ.ഡി.ഒ യിൽ ചേർന്നു.

ഒരു മിസൈൽ പദ്ധതിക്ക് നേതൃത്വം നൽകുന്ന ഭാരതത്തിലെ ആദ്യ വനിതയാണ് ടെസ്സി തോമസ്. ടെസ്സി തോമസിനെ ഭാരതത്തിന്റെ ദീർഘദൂര ബാലിസ്റ്റിക് മിസൈൽ പദ്ധതിയിലേക്ക് നിയമിച്ചത് ഡോ. എപിജെ അബ്ദുൽ കലാം ആയിരുന്നു. അധികം വൈകാതെ ടെസ്സി ഡിആർഡിഒയുടെ ആയുധ പദ്ധതിയിൽ ഒരു വഴിത്തിരിവായി. പ്രതിരോധ ഗവേഷണ വികസന സംഘടനയുടെ ഇന്റഗ്രേറ്റഡ് ഗൈഡഡ് മിസൈൽ വികസന പദ്ധതിക്ക് കീഴിലാണ് ബാലിസ്റ്റിക് മിസൈലുകളുടെ അഗ്നി സീരീസ് വികസിപ്പിച്ചുകൊണ്ടിരിക്കുന്നത്. അഗ്നി സീരീസ് മിസൈലുകൾ മൾട്ടി-സ്റ്റേജ് ടൈപ്പ് ആണ്, അത് അവയെ മറ്റ് മിസൈലുകളിൽ നിന്ന് വ്യത്യസ്തമാക്കുന്നു. നിലവിൽ അഞ്ച് മിസൈലുകൾ - അഗ്നി I, അഗ്നി II, അഗ്നി III, അഗ്നി IV, അഗ്നി V - വിജയകരമായി വിക്ഷേപിച്ചു. 1989 മെയ് മാസത്തിൽ ആദ്യമായി പരീക്ഷിച്ച ഹ്രസ്വ അല്ലെങ്കിൽ ഇന്റർമീഡിയറ്റ് റേഞ്ച് ബാലിസ്റ്റിക് മിസൈലാണ് അഗ്നി -1. ഈ മിസൈലിന് 700 കിലോമീറ്റർ മുതൽ 800 കിലോമീറ്റർ വരെ ദൂരം സഞ്ചരിക്കാൻ സാധിക്കും. പിന്നീട് വന്ന രണ്ടായിരം കിലോമീറ്ററിലധികം ദൂരപരിധിയുള്ള അഗ്നി -2, ഒരു ഇടത്തരം ബാലിസ്റ്റിക് മിസൈലാണ്.

3000 കിലോമീറ്റർ ദൂര പരിധിയുള്ള അഗ്നി 3 മിസൈൽ പദ്ധതിയിൽ പങ്കാളി ആയിരുന്ന ടെസ്സി തോമസ്. അഗ്നി പദ്ധതിയിൽ പ്രവൃത്തിക്കുമ്പോൾ തന്നെ മിസ്സൈലുകൾക്കു വേണ്ടി അഡ്വാൻസ്ഡ് ഗൈഡിങ് സിസ്റ്റം ഇവർ വികസിപ്പിച്ചു. ഇന്ത്യൻ മിസൈൽ രംഗത്ത് ആദ്യത്തെ പദ്ധതി ആയിരുന്നു ഇത്. അതിനു ശേഷം റീ എൻട്രി വെഹിക്കിൾ സിസ്റ്റം എന്ന ടെക്നോളജി വികസിപ്പിച്ചെടുത്ത ടെസ്സി തോമസ് 2009 ൽ അഗ്നി മിസൈൽ പദ്ധതികളുടെ മേധാവിയായി തിരഞ്ഞെടുക്കപ്പെട്ടു. ഗൈഡൻസ്, കൺട്രോൾ, ഇനേഷ്യൽ നാവിഗേഷൻ, ട്രജക്ടറി സിമുലേഷൻ, മിഷൻ ഡിസൈൻ തുടങ്ങി വിവിധ മേഖലകളിൽ അവർ സംഭാവന നൽകിയിട്ടുണ്ട്.

2011 ൽ വിജയകരമായി പരീക്ഷിച്ച അഗ്നി 4 ഉം 2012 വിജയകരമായി പരീക്ഷിച്ച അഗ്നി 5 ഉം ഈ അഗ്നി പുത്രിയുടെ മേൽനോട്ടത്തിൽ പൂർത്തീകരിച്ച പദ്ധതികൾ ആയിരുന്നു. സോളിഡ് പ്രൊപ്പല്ലന്റ് സിസ്റ്റങ്ങളിൽ വിദഗ്ദ്ധയായ ടെസ്സിയുടെ സംഭാവനകൾ അഗ്നി-5 ന്റെ മൾട്ടിപ്പിൾ ടാർഗെറ്റബിൾ റീ-എൻട്രി വെഹിക്കിൾ വികസിപ്പിക്കുന്നതിൽ നിർണ്ണായകമായിരുന്നു. അന്തരീക്ഷത്തിലേക്ക് വീണ്ടും പ്രവേശിക്കുമ്പോൾ ഭൂഖണ്ഡാന്തര ബാലിസ്റ്റിക് മിസൈലിന് അതിശയകരമായ വേഗതയും 3,000 ഡിഗ്രി സെൽഷ്യസ് താപനിലയും നിലനിർത്താൻ സഹായിച്ചത് ഇതാണ്. അഗ്നി- 5 ന്റെ വിജയത്തിലേക്കുള്ള യാത്ര എളുപ്പമുള്ള ഒന്നായിരുന്നില്ല. ഓരോ ഘട്ടത്തിലും, ടെസ്സിയെ പരാജയങ്ങളും നിരാശകളും സ്വാഗതം ചെയ്തുവെങ്കിലും പുനർവിചിന്തനം ചെയ്യാനും പുനർനിർമിക്കാനും നിലവിലെ മോഡലിനെ മെച്ചപ്പെടുത്താനുമുള്ള അവസരമായി അവർ അതിനെ സ്വീകരിച്ചു. ഉദാഹരണത്തിന്, 2006 ജൂലൈയിൽ, ആവശ്യമുള്ള മാനദണ്ഡങ്ങൾ പാലിക്കുന്നതിൽ ഒരു മിസൈൽ പരാജയപ്പെട്ടു, ടീമിന് ധാരാളം വിമർശനങ്ങൾ നേരിടേണ്ടിവന്നു. എന്നാൽ അതിനെ ഒരു വെല്ലുവിളിയായി സ്വീകരിച്ച ടെസ്സി കേവലം പത്തുമാസത്തിനുള്ളിൽ പരാജയത്തെ മറ്റൊരു വിജയമാക്കി മാറ്റുന്നതിനായി തെറ്റുകൾ കാര്യക്ഷമമായി പരിഹരിച്ചു. മാത്രമല്ല, ഡിആർഡിഒയുടെ അഡ്വാൻസ്ഡ് സിസ്റ്റംസ് ലബോറട്ടറി ഡയറക്ടർ എന്ന നിലയിൽ ടെസ്സി ബഹുമുഖ വേഷങ്ങളും ഉത്തരവാദിത്തങ്ങളും വഹിക്കുകയും 2014 മുതൽ 2018 വരെ തന്ത്രപരമായ മിസൈൽ സംവിധാനത്തിന്റെ വികസനത്തിന് നേതൃത്വം നൽകുകയും ചെയ്തു.

ഡി‌ആർ‌ഡി‌ഒ അഗ്നി അവാർഡ് ഫോർ എക്സലൻസ് ഇൻ സെൽഫ്-റിലൈൻസ്– 2001, ഡി‌ആർ‌ഡി‌ഒ അവാർഡ് ഫോർ പാത് ബ്രേക്കിംഗ് റിസർച്ച്/ഔട്‍സ്റ്റാൻഡിങ് ടെക്നോളജി ടെവലപ്മെന്റ്റ് -2007, ഡി‌ആർ‌ഡി‌ഒ സയന്റിസ്റ്റ് ഓഫ് ദി ഇയർ അവാർഡ്-2008, 2009 ലെ ഇന്ത്യാ ടുഡേ വുമൺ, 2011, 2012 വർഷങ്ങളിലെ ഡി‌ആർ‌ഡി‌ഒ പെർഫോമൻസ് എക്സലൻസ് അവാർഡ്, ലാൽ ബഹാദൂർ ശാസ്ത്രി നാഷണൽ അവാർഡ് ഫോർ എക്സലൻസ് ഇൻ പബ്ലിക് അഡ്മിനിസ്ട്രേഷൻ അക്കാദമിക്സ് ആൻഡ് മാനേജ്‌മന്റ്-2012, സി‌എൻ‌എൻ - ഐ.ബി.എൻ ഇന്ത്യൻ ഓഫ് ദി ഇയർ, വുമൺ ഇൻ സയൻസ് ആന്റ് എഞ്ചിനീയറിംഗിന്റെ (WISE) മികച്ച വുമൺ അച്ചീവർ അവാർഡ് എന്നിവയുൾപ്പെടെ നിരവധി അഭിമാനകരമായ അവാർഡുകളും ടെസ്സിക്ക് ലഭിച്ചിട്ടുണ്ട്.